Nagsagawa ang Negros Oriental Police Provincial Office (NOrPPO) ng isang Service Caravan bilang bahagi ng pagdiriwang ng ika-31 Police Community Relations (PCR) Month sa Barangay Manseje, Bindoy, Negros Oriental nito lamang ika-14 ng Hulyo 2026.
Sa pangunguna ni PMaj Elpidio R. Tago-an Jr., Acting Chief ng Police Community Affairs and Development Unit (PCADU), at sa ilalim ng pamumuno ni PCol Timmar J. Alam, Provincial Director ng NOrPPO, nakiisa ang kapulisan sa Medical, Legal, and Social Services (MLSS) Program ng Pamahalaang Panlalawigan ng Negros Oriental upang ilapit ang mahahalagang serbisyo ng pamahalaan sa mga mamamayan ng Barangay Manseje.
Nanguna sa programa ang Pamahalaang Panlalawigan ng Negros Oriental sa pamumuno ni Governor Manuel “Chaco” L. Sagarbarria, katuwang ang Lokal na Pamahalaan ng Bindoy, si Hon. Jessica Jane Villanueva, Board Member ng Unang Distrito ng Negros Oriental, mga opisyal ng barangay, iba pang ahensya ng pamahalaan, at mga partner organization na nagkaisa sa layuning makapaghatid ng maagap at de-kalidad na serbisyo sa komunidad.
Bilang bahagi ng adbokasiya ng NOrPPO sa community outreach, namahagi ang mga pulis ng 100 pares ng tsinelas sa ilalim ng programang “Tsinelas ni Tsip,” nagsagawa rin ang grupo ng libreng gupit, at namahagi ng SAFE NIR Dial 911 flyers at iba pang Information, Education, and Communication (IEC) materials upang higit pang mapalawak ang kaalaman ng publiko hinggil sa kaligtasan, pag-iwas sa krimen, at kahalagahan ng pakikipagtulungan sa kapulisan.
Samantala, nagbigay naman ang MLSS Program ng iba’t ibang libreng serbisyo tulad ng medical at dental consultations, minor surgical procedures, circumcision, laboratory services, legal assistance, veterinary services, agricultural support, PESO livelihood assistance, manicure at pedicure, pamamahagi ng reading glasses, ear-piercing services, at iba pang programang pangkabuhayan at panlipunan ng pamahalaan.
Tinatayang mahigit 1,000 residente, lalo na ang mga mula sa mga liblib at underserved na komunidad, ang nakinabang sa naturang Service Caravan, isang patunay na ang sama-samang pagkilos ng iba’t ibang sektor ay nagbubunga ng serbisyong tunay na nararamdaman ng mamamayan.
Sa pamamagitan ng gawaing ito, muling pinagtibay ng Negros Oriental Police Provincial Office at ng mga katuwang nitong ahensya ang kanilang pangako na patuloy na isulong ang community-oriented policing, palakasin ang ugnayan ng pulisya at komunidad, at tiyaking ang bawat serbisyo ng pamahalaan ay naaabot maging sa pinakamalayong pamayanan.
Ang matagumpay na Service Caravan ay sumasalamin sa adhikain ng “Bagong PNP para sa Bagong Pilipinas: Serbisyong mabilis, tapat, at nararamdaman,” kung saan ang kapulisan ay hindi lamang tagapagpatupad ng batas kundi tunay na katuwang ng bawat mamamayan sa pagbuo ng isang ligtas, maunlad, at nagkakaisang pamayanan.
Panulat ni Pat Andrea Dominique Depalubos
Source: Negros Oriental Police Provincial Office
