Muling pinatunayan ng Police Regional Office – Negros Island Region (PRO-NIR) ang matatag nitong paninindigan laban sa ilegal na droga at mga hindi lisensiyadong baril matapos ang matagumpay na pagpapatupad ng search warrant na nauwi sa pagkakaaresto ng isang suspek sa Barangay Combado, Bacong, Negros Oriental, noong madaling araw ng Hulyo 3, 2026.
Isinagawa ang operasyon sa pangunguna ng Bacong Municipal Police Station (MPS), katuwang ang Provincial Intelligence Unit (PIU) at ang 5th Maneuver Company, Regional Mobile Force Battalion (RMFB), bilang bahagi ng pinaigting na kampanya ng Philippine National Police laban sa kriminalidad at sa pagpapanatili ng kapayapaan at seguridad ng komunidad.
Nagsimula ang operasyon mula sa isang reklamong pagbabanta gamit ang baril na naganap sa isang rooster-matching activity.
Matapos ang masusing surveillance, intelligence gathering, at beripikasyon ng impormasyon, nakakuha ng search warrant ang mga awtoridad mula sa hukuman, na naging daan sa legal at maayos na pagsasagawa ng operasyon.
Sa isinagawang paghahalughog, nakumpiska ang ilang sachet ng hinihinalang shabu, isang digital weighing scale, cash na pinaniniwalaang mula sa bentahan ng ilegal na droga, isang 9mm revolver, at mga bala ng iba’t ibang kalibre, na nagsisilbing matibay na ebidensiya laban sa suspek.
Alinsunod sa umiiral na batas, ipinaalam sa suspek ang dahilan ng kanyang pagkakaaresto at ang kanyang mga karapatan.
Ang matagumpay na operasyong ito ay patunay ng walang humpay na pagsisikap ng PRO-NIR na sugpuin ang ilegal na droga, mga loose firearms, at iba pang uri ng kriminalidad sa rehiyon.
Sa pamamagitan ng SAFE NIR Program at sa ilalim ng bisyon ng “Bagong PNP para sa Bagong Pilipinas: Serbisyong mabilis, tapat, at nararamdaman,” patuloy na isinusulong ng PRO-NIR ang isang ligtas, mapayapa, at maunlad na komunidad sa buong Negros Island Region.
Patuloy ding nananawagan ang PRO-NIR sa publiko na makiisa at makipagtulungan sa mga awtoridad sa pamamagitan ng maagap na pagbibigay ng impormasyon upang higit pang mapalakas ang kampanya laban sa ilegal na droga, mga loose firearms, at iba pang banta sa kapayapaan at kaayusan.
Panulat ni Pat Andrea Dominique Depalubos
