Ganap nang nasa kustodiya ng mga awtoridad ang lahat ng limang itinuturong gunmen sa pagpaslang kay Konsehal Alfredo T. Alvarez ng bayan ng Rizal, Cagayan, matapos maaresto ng Criminal Investigation and Detection Group (CIDG) ang isa pang pangunahing suspek nitong Enero 6, 2026.
Bandang alas-4:00 ng hapon noong Enero 6, inaresto ng CIDG Kalinga Provincial Field Unit, katuwang ang mga territorial police units, ang suspek na kinilalang si “Jose” sa Barangay San Pedro, Rizal, Kalinga. Isinagawa ang operasyon sa bisa ng dalawang Warrant of Arrest para sa kasong Murder na inilabas ng hukuman ng Tuguegarao City noong Pebrero 14, 2022 at Nobyembre 24, 2025.
Ang suspek, na si “Jose,” 57 taong gulang, may asawa, at residente ng lugar ng kanyang pagkakaaresto, ay miyembro ng DI-listed “Labang Criminal Group” at itinuturing na Number 4 Regional Most Wanted Person sa Cagayan Valley.
Ang naturang grupo ay iniuugnay sa iba’t ibang seryosong krimen gaya ng gun-for-hire, robbery, akyat-bahay, extortion, carnapping, at cattle rustling sa ika-3 distrito ng Cagayan Valley at mga karatig-probinsya ng Kalinga at Isabela.
Batay sa imbestigasyon, noong Hulyo 29, 2018 sa San Gabriel, Tuguegarao City, pinaniniwalaang si “Jose” at ang apat pa niyang kasabwat ay inatake at binaril si Konsehal Alvarez kapalit ng salapi, na naging sanhi ng agarang pagkamatay ng biktima. Si “Jose” ang ikatlong suspek na nadakip ng CIDG, kasunod ng pag-aresto kina “Den” at “Simeon,” habang ang dalawa pang suspek na sina “Jocel” at “Jessie” ay nauna nang nadakip at kasalukuyang nakakulong sa Cagayan Provincial Jail.
Pinuri ni PMGen Robert Alexander A. Morico II, Director ng CIDG, ang intelligence-driven at mahusay na koordinasyon ng kanilang mga yunit sa pangunguna ng CIDG Regional Field Units 2 at 14 at ng CIDG Kalinga Provincial Field Unit.
Tiniyak ng CIDG na magpapatuloy ang mas pinaigting na manhunt operations sa buong bansa bilang bahagi ng kanilang layuning panagutin ang lahat ng wanted na kriminal at makamit ang hustisya para sa mga biktima at kanilang mga pamilya.
