Naaresto ng mga tauhan ng Regional Maritime Unit 11 ng PNP Maritime Group (MG) ang anim (6) na indibidwal sa magkakahiwalay na operasyon sa Davao Region noong ika-1 ng Setyembre 2025.
Unang naaresto ng Davao City Maritime Police Station (MARPSTA) si alyas “Wel” sa Gem Village, Maa, Davao City dahil sa paglabag sa Ecological Solid Waste Management Ordinance na may kaugnayan sa Republic Act 9003 o “Ecological Solid Waste Management Act of 2000”.
Sa isa namang operasyon ng Davao Oriental MARPSTA, naaresto si alyas “Tenten”, 29 taong gulang, sa Poblacion District, Barangay 29-C, Davao City. Siya ay nahaharap din sa kasong paglabag sa Davao City Ecological Waste Management Ordinance.
Samantala, sa Barangay 19, Davao City, naaresto si alyas “Alo”, 30 taong gulang, ng mga operatiba ng Davao City MARPSTA sa paglabag sa Republic Act 9147 o “Wildlife Resources Conservation and Protection Act”.
Naaresto din si alyas “Enteng” ng Davao del Norte MARPSTA sa Purok Kawayan, Union, Monkayo, Davao de Oro. Siya ay nahaharap sa kasong paglabag sa Comelec Gun Ban.
Samantala, naaresto si alyas “Ron”, 39 taong gulang, ng Davao Oriental MARPSTA sa Barangay 23-C Boulevard, Davao City. Siya ay nahaharap sa kasong paglabag sa Republic Act 11332 o ang “Mandatory Reporting of Notifiable Diseases and Health Events of Public Health Concern Act”.
Sa Mati City, Davao Oriental, naaresto ng Davao Oriental MARPSTA ang Provincial Top 10 Most Wanted sa Davao Oriental na kinilalang si alyas “Teng” sa kasong Frustrated Murder.
Ayon sa PNP Maritime Group, ang mga operasyong ito ay bahagi ng kanilang pinaigting na kampanya laban sa mga lumalabag sa mga batas pangkalikasan at iba pang may kaugnayan na batas, upang mapanatili ang kaayusan ng kapaligiran at balanse ng ecosystem ng bansa.
Panulat ni Pat Jeanno Jay T Santos
