Patuloy na pinaiigting ng 2nd Cagayan Provincial Mobile Force Company (PMFC) ang kampanya para sa kaligtasan ng komunidad sa pamamagitan ng Project A.L.E.R.T. (Awareness Lecture to End War on Terrorism and Illegal Drugs) at pakikilahok sa mga barangay assembly na isinagawa noong Oktubre 16–17, 2026, sa Abulug, Gattaran, at Lasam, Cagayan. Layunin ng mga aktibidad na palawakin ang kaalaman ng publiko sa crime prevention, pag-iwas sa terorismo, ilegal na droga, at bullying.
Sa pangunguna ni PLt Alejandro Romina, Platoon Leader ng 1st Mobile Force Platoon (MFP), nagsagawa ng awareness lecture sa Libertad National High School, Abulug, kung saan tinalakay ang Republic Act No. 9165 o Comprehensive Dangerous Drugs Act of 2002, Republic Act No. 10627 o Anti-Bullying Act of 2013, at kamalayan laban sa terorismo. Nakibahagi rin ang mga tauhan sa Barangay Assembly sa Brgy. Calog Sur, Abulug, upang ipaliwanag ang mahahalagang probisyon ng Republic Act No. 11479 o Anti-Terrorism Act of 2020 at mga batas laban sa ilegal na droga.
Samantala, pinangunahan ni PCMS Leonard Tarubal ang Project A.L.E.R.T. sa Brgy. Mabuno at Brgy. Peña Este, Gattaran, na nakatuon sa mga panganib ng terorismo, mga palatandaan ng radicalization, at kahalagahan ng agarang pag-uulat ng mga kahina-hinalang gawain.
Sa Lasam, nakibahagi ang 3rd MFP, sa pangunguna ni PCMS Jayson T. Gaffud, kasama ang Lasam Police Station, Bureau of Fire Protection Lasam, mga miyembro ng Sangguniang Bayan, at mga guro ng San Pedro Elementary School sa Barangay Assembly Day sa Brgy. San Pedro. Tinalakay sa pagtitipon ang mga hakbang upang maiwasan ang pangangalap ng mga teroristang grupo, pagpigil sa krimen, at pagpapanatili ng kapayapaan at kaayusan.
Sa pamamagitan ng tuloy-tuloy na information dissemination at pakikipag-ugnayan sa mga komunidad, patuloy na isinusulong ng 2nd CPMFC ang isang ligtas, mapayapa, at responsableng pamayanan. Hinihikayat din ang publiko na makiisa sa mga programa sa pag-iwas sa krimen, maging mapagmatyag, at agad na iulat sa kinauukulan ang mga kahina-hinalang aktibidad.
Kaakibat ng mga hakbang na ito ang paninindigan ng Philippine National Police sa adbokasiyang “Bagong PNP para sa Bagong Pilipinas: Serbisyong Mabilis, Tapat, at Nararamdaman,” na nagbibigay-diin sa maagap, tapat, at makataong paglilingkod para sa kapakanan at seguridad ng bawat Pilipino. Source: PNP 2nd Cagayan PMFC (https://www.facebook.com/share/p/1HhKH4x9e9/?mibextid=wwXIfr)
