Muling pinatunayan ng Bacolod City Police Office (BCPO) ang kanilang walang sawang dedikasyon sa pagpapanatili ng kapayapaan at kaayusan matapos matagumpay na maaresto ang dalawang suspek na sangkot sa isang insidente ng robbery hold-up sa Barangay 19, Bacolod City.
Sa ilalim ng pamumuno ni PCol Eugene N. Rebadomia, City Director ng BCPO, nagsagawa ang mga operatiba ng Police Station 1 ng masinsinang follow-up operations na nagresulta sa pagkakadakip ng dalawang suspek sa magkahiwalay na operasyon noong Mayo 30 at 31, 2026.
Ang mabilis na pagkilos ng mga pulis, sa pakikipag-ugnayan sa biktima at iba pang yunit ng kapulisan, ay naging susi sa pagtunton at pag-aresto sa mga suspek.
Sa operasyon laban sa ikalawang suspek, nabawi rin ng mga awtoridad ang isang Yamaha Sniper 150 motorcycle, isang iPhone 17 Pro, at isang Samsung Galaxy A55 5G na may kaugnayan sa insidente.
Ang matagumpay na operasyong ito ay patunay ng pinaigting na kampanya ng Philippine National Police laban sa kriminalidad at ng kanilang layuning tiyakin na ang mga lumalabag sa batas ay agad na mananagot sa kanilang mga ilegal na ginawa.
Sa pamamagitan ng maagap na pagtugon, mahusay na koordinasyon, at walang humpay na pagsisikap ng mga operatiba, ipinakita ng BCPO na ang seguridad ng publiko ay nananatiling pangunahing prayoridad.
Kasabay nito, patuloy nilang hinihikayat ang komunidad na makipagtulungan sa kapulisan upang higit pang mapalakas ang kampanya laban sa krimen at mapanatili ang isang ligtas at maayos na Bacolod City alinsunod sa hangarin na “Bagong PNP para sa Bagong Pilipinas:Serbisyong Mabilis, Tapat, at Nararamdaman.”
Writer : Pat Andrea Dominique Depalubos
Source : PNP PIO BCPO
