Patuloy na pinaiigting ng Nueva Ecija Police Provincial Office (PPO) ang pagpapatupad ng Oplan Galugad na nagresulta sa boluntaryong pagsuko ng 10 baril at pagkakakumpiska ng 17 ream ng mga hinihinalang ilegal na sigarilyo sa magkakahiwalay na operasyon sa lalawigan mula umaga ng Oktubre 23 hanggang umaga ng Oktubre 24, 2026.
Isinagawa ang mga operasyon ng mga tauhan ng Cabanatuan City, Talavera, Zaragoza, Santa Rosa, Carranglan, Nampicuan, Llanera, at Talugtug Police Stations, gayundin ng Palayan City at Science City of Muñoz Police Stations. Sa pamamagitan ng pagbisita sa mga tahanan at iba pang kaugnay na aktibidad, layunin ng kapulisan na matukoy ang mga baril na hindi na rehistrado o paso na ang lisensiya at maiwasan ang posibleng paggamit ng mga ito sa krimen.
Kabilang sa mga boluntaryong nagsuko ng baril ang mga dating opisyal, kawani ng pamahalaan, negosyante, magsasaka, at iba pang residente ng lalawigan. Nagdeposito rin ang Regent Blue Force Services Inc. ng isang baril sa Cabanatuan City Police Station para sa ligtas na pag-iingat. Ang mga nakuhang baril ay kinabibilangan ng mga pistola, shotgun, at isang improvised shotgun na kilala bilang “sumpak”; karamihan sa mga ito ay may paso ng rehistro o lisensiya at inilagay sa kustodiya ng pulisya para sa wastong disposisyon.
Samantala, nakatanggap ang Palayan City Police Station ng boluntaryong pagsuko ng limang ream ng Red Carnival cigarettes mula sa isang may-ari ng tindahan. Narekober naman ng Gabaldon Municipal Police Station ang 12 ream ng produktong tabako na may tatak na GIFT na iniulat na natagpuang walang nagmamay-ari sa isang waiting shed. Tinatayang nagkakahalaga ng Php14,400 ang mga produktong tabako.
Sa pamumuno ni PCol Ritchie R. Claravall, Provincial Director ng NEPPO, patuloy nilang palalakasin ang kampanya laban sa mga loose firearm at ilegal na produktong tabako sa pamamagitan ng tuloy-tuloy na operasyon at pakikipagtulungan sa komunidad. Hinikayat din ang mga may-ari ng baril na sumunod sa umiiral na batas at makipag-ugnayan sa pinakamalapit na himpilan ng pulisya hinggil sa pag-renew ng lisensiya at rehistro, gayundin ang publiko na iulat ang mga ilegal na gawain.
Isinagawa ang mga hakbang bilang suporta sa mga direktiba ni PBGen Jess B. Mendez, Regional Director ng Police Regional Office 3 (PRO3), at PNP Chief PGen Jose Melencio C. Nartatez Jr. upang higit na mapalakas ang seguridad sa Central Luzon, alinsunod sa adhikain ng PNP na “Bagong PNP para sa Bagong Pilipinas: Serbisyong Mabilis, Tapat, at Nararamdaman.”
Source: Nueva Ecija PPO (https://www.facebook.com/share/p/1DP7uzYZCh/)
