Iloilo – Arestado ang isang wanted person sa isinagawang manhunt operation ng Estancia Municipal Police Station sa Don T Lutero Center, Poblacion, Janiuay, Iloilo pasado alas-dies ng umaga, ika-5 ng Disyembre, 2022.
Kinilala ni Police Lieutenant Arniel Buraga, Officer-In-Charge ng Estancia PNP, ang subject person na si alyas Antonio, 34, walang asawa, laborer at mula sa Oas, Albay at kasalukuyang nakatira sa Brgy. Tacbuyan, Estancia, Iloilo.
Ayon kay PLt Buraga, ang subject person ay naaresto sa bisa ng Warrant of Arrest sa kasong Attempted Murder na may inirekomendang piyansa para kanyang pansamantalang kalayaan.
Ayon pa kay PLt Buraga, ang suspek ay matatandaang tumakas nang ito’y arestuhin matapos mangyari ang insidente ng tangkang pagpatay noong 2009 sa lalawigan ng Albay at nagtungo sa Metro Manila upang magtago doon at nitong nakaraang 2019 ay nagtungo ito sa Estancia, Iloilo matapos niyang makilala ang kanyang live-in partner sa Metro Manila at sila’y nakatira sa Brgy. Tacbuyan, Estancia, Iloilo.
Ang pagkakaaresto sa suspek ay resulta ng pagtutulungan ng mga operatiba ng Regional Intelligence Division, Regional Intelligence Unit 6, Oas MPS, Albay PPO, PRO5, Janiuay MPS at Estancia MPS.
Patuloy pa rin ang pambansang pulisya sa pagtugis ng mga taong nagtatago at may pananagutan sa batas upang mabigyan ng hustisya ang kanilang mga nabiktima.
