Negros Oriental — Patay ang tinaguriang number one Most Wanted Person ng Central Visayas sa operasyon ng PNP at AFP sa Barangay Malabugas, Bayawan City, Negros Oriental nito lamang Lunes, Hulyo 31, 2023.
Kinilala ni Police Brigadier General Anthony Aberin, Regional Director ng PRO 7, ang napatay na si “Mayagma”, residente ng Brgy. Minaba, Bayawan City, Negros Oriental.
Ayon sa report ng Provincial Director ng Negros Oriental Police Provincial Office, Police Colonel Ronan R Claravall, bandang 10:55 ng umaga ng ilunsad ng pinagsanib na operasyon ng mga operatiba ng PIU/SOG NOPPO, RID7-RSOG/SOTG, RIU7, 1st PMFC, 2nd PMFC, RMFB7, 63rd SAC SAF, ISAFP, at Bayawan City Police Station ang pagsisilbi ng Warrant of Arrest laban sa suspek para sa mga kasong four counts ng murder, R.A 10591 at COMELEC Gun Ban.
Namataan si Mayagma sa nasabing lugar, nang lapitan ito ng mga arresting officer, nagkaroon ng kumusyon at nagawang dinisarmahan ang suspek.
Gayunpaman, tinangka pa rin nitong ilabas ang isa pa niyang armas na nakatago sa loob ng kanyang sling bag at tinangkang barilin ang mga operatiba, na nag-udyok sa mga ito na magpaputok at ipagtanggol ang sarili.
Agad naman na dinala ang suspek sa pinakamalapit na ospital ngunit idineklara itong dead on arrival.
Sa pahayag ni PBGen Aberin, ang buong hanay ng Police Regional Office 7 ay patuloy na magsasagawa ng matapang at mabilis na operasyon laban sa mga kriminal upang mabilis na mabigyan ng hustisya ang mga biktima nito at ang karahasan ay walang puwang sa probinsya ng Negros Oriental maging sa buong rehiyon.
