Arestado ang tatlong indibidwal matapos makumpiska sa kanila ang hinihinalang shabu at baril sa isinagawang Checkpoint Operation ng mga awtoridad ng Gen. Salipada K. Pendatun Municipal Police Station sa National Highway ng Barangay Panosolen, GSKP, Maguindanao del Sur noong ika-29 ng Marso 2024.
Kinilala ni Police Captain Lucky Seigfred R Sibayan, Hepe ng Gen. Salipada K. Pendatun MPS, ang mga suspek na sina alyas “Racky”, alyas “Doro” at alyas “Daryl” na pawang mga residente ng Buluan, Maguindanao del Sur.
Bandang alas-10 ng umaga nang magsagawa ng joint checkpoint operation ang nasabing mga awtoridad katuwang ang mga tauhan ng Provincial Investigation Unit ng MDS at 14 Mech Company, 1st Mech Battalion, Armor Division, Philippine Army nang mapansin nila ang isang Toyota Innova na may plakang NIQ 386 at agad naman itong sinita at pinahinto ng mga awtoridad at nang ito’y suriin ay nakitaan ang mga sakay ng naturang sasakyan ng isang di lisensyadong baril na nagresulta sa pagkakaaresto ng nasabing mga suspek.
Nakumpiska mula sa mga suspek ang homemade Uzi Caliber 9mm, isang magazine na may limang piraso ng bala, at isang sachet na pinaniniwalaang shabu na may timbang na 1.9 gramo at nagkakakahalaga ng Php12,920.
Ang mga suspek ay mahaharap sa kasong paglabag sa Republic Act 9165 o “Comprehensive Dangerous Drugs Act of 2002” at RA 10591 o “Comprehensive Firearms and Ammunition Regulation Act“ kapag napatunayang nagkasala ang mga ito.
Ang mga naarestong suspek ay kasalukuyang nasa pangangalaga ng GSKP MPS para sa tamang disposisyon habang ang nakumpiskang mga ebidensya ay isusumite sa Regional Forensic Unit, BAR para sa ballistic examination.
Tiniyak naman ng buong hanay ng PRO BAR na mas lalong paiigtingin ang pagpapatrolya sa lansangan at sa kanilang mga nasasakupan upang maagapan ang anumang krimen at hindi inaasahang pangyayari.
Panulat ni Pat Veronica Laggui
