Nakiisa ang pamunuan ng Police Regional Office 2 sa pangunguna ni Police Brigadier General Marcial Mariano Magistrado IV, Deputy Regional Director for Administration sa isinagawang eGovPh Launching at Kick-off Ceremony na ginanap sa Coliseum Sports Complex, Tuguegarao City, Cagayan, nito lamang ika-9 ng Disyembre 2024.
Ang eGov app o e-Government Philippines app, ay alinsunod sa digitization agenda ng “Bagong Pilipinas Brand of Governance”. Layunin nitong mapataas ang antas ng mga serbisyong pampamahalaan at mabawasan ang pangangailangan para sa mga personal na transaksyon.
Sa pamamagitan ng iisang platform na pinagsama-sama ang mga serbisyo ng lokal at pambansang pamahalaan, mas nagiging accessible ang mga ito sa iisang mobile app.
Bahagi din dito ang PNP Law enforcement Reposting Information System (PNP LERIS), kung saan malayang makakapag-ulat ang mga mamamayan ng mga krimen at insidente sa pinakamalapit na istasyon ng pulisya na makakatanggap agad ng impormasyon. Ang tugon ng pulisya ay lalong pinabilis upang mapigilan ang krimen sa tulong ng eGovPH app.
Layunin ng programang ito na mapabilis ang koordinasyon at paghahatid ng serbisyo ng pamahalaan upang makamit at magkaroon ng mapayapa at maunlad na komunidad.
Source: Police Regional Office 2
Panulat ni PSSg Marilyn Maggay
