Sa gitna ng mga unos at hamon na kinakaharap ng probinsya ng Batanes, buong puso at lakas na nagtulungan ang mga kapulisan ng Batanes Police Provincial Office at Batanes Provincial Mobile Force Platoon, para sa pagdiskarga ng Family Food Packs (FPP’s) na lulan ng Barko ng Republika ng Pilipinas-Waray na dumaong sa Basco Pier, Basco, Batanes nito lamang ika-14 ng Setyembre 2024.
Pinangunahan ni Police Colonel Victorino B Valdez, Provincial Director, Batanes Police Provincial Office katuwang si Police Lieutenant Lambertson L Bartido, Asst. Platoon Leader ng 1st Batanes PMFP, kasama ng kapulisan sa pagtulong ang iba’t ibang ahensya ng gobyerno, mga uniformed personnel, reservists, at mga boluntaryong sibilyan.
Umabot naman sa 6,198 Family Food Packs mula sa Department of Social Welfare and Development ang nasabing food packs para sa paghahanda ng probinsya sa sunud-sunod na mga bagyo at iba pang mga pangunahing mga pangangailangan gaya ng mga kagamitang pangmedikal at mga bigas. Gayundin, ay may sakay din itong 100 drums ng gasolina bilang tugon sa kasalukuyang sitwasyon ng probinsya na pagkaubos ng mga gasolina.
Ang pagkakaisa at bayanihan na ipinakita ng bawat isa ay patunay ng walang sawang malasakit ng pamahalaan at mga mamamayan sa pagtugon sa mga pangangailangan ng komunidad, lalo na sa panahon ng krisis.
Source: Batanes Police Provincial Office
Panulat ni Pat Wendy G Rumbaoa
