Negros Oriental – Aabot sa higit kalahating milyon na halaga ng shabu ang nasamsam ng kapulisan sa isang High Value Individual na suspek na naaresto sa buy-bust operation sa Prk. Kalubihan, Brgy. Bajumpandan, Dumaguete City, Negros Oriental noong Setyembre 22, 2023.
Inilunsad ang operasyon ng mga tauhan ng Dumaguete City Police Station, Negros Oriental Provincial Drug Enforcement Unit, PNP Drug Enforcement Group, Regional Intelligence at Drug Enforcement Unit 7 dakong alas-3:59 ng umaga noong Biyernes.
Kinilala ni Police Colonel Ronan Claraval, Acting Provincial Director ng Negros Oriental Police Provincial Office, ang suspek na si alyas “Kiki”, 44, ng Purok 2, Combado, Bacong, Negros Oriental.
Nakumpiska mula sa suspek ang nasa 75 gramo ng hinihinalang shabu na may Standard Drug Price na Php510,000, isang unit ng Redme Android Smart Phone, camouflage na sling bag, at buy-bust money.
Mga kaukulang paglabag sa RA 9165 o Comprehensive Dangerous Drugs Act of 2002 ang kasong kakaharapin ng suspek.
Ang Negros Oriental PNP ay masigasig na labanan ang ilegal na droga sa syudad at sinisiguro ang kaligtasan ng bawat mamamayan sa kanilang nasasakupan.
