Arestado ang isang High Value Individual (HVI) at tatlong street-level drug dealers at nakumpiska ang Php476K halaga ng ilegal na droga at baril sa ikinasang drug buy-bust operation ng Station Drug Enforcement Team (SDET) ng Iloilo City Police Station 2 sa Zone 3, Barangay Baldoza, La Paz, Iloilo City nito lamang ika-12 ng Nobyembre 2024.
Ang mga arestadong suspek ay kinilalang sina Alyas “Gilbert”, 52 taong gulang, itinuturing na isang High Value Individual, at ang mga street-level drug dealers na sina Alyas “Gilda”, 52 taong gulang, alyas “Rene”, 30 taong gulang, at alyas “Junner”, 42 taong gulang, pawang mga residente ng nasabing barangay.
Ayon kay Police Major Tranquilino Querubin Jr., Officer-in-Charge ng Iloilo City Police Station 2 (ICPS2), isang linggo nilang minonitor ang mga aktibidad ng mga suspek bago isinagawa ang operasyon.
Nakuha ang isang sachet ng hinihinalang shabu mula kay alyas “Gilbert”, gamit ang Php5,000 na buy-bust money. Bukod dito, nakuhanan pa ng karagdagang 13 sachets ng suspected shabu mula sa kanyang bulsa.
Maliban sa droga, nakuhanan din si alyas “Gilbert” ng isang caliber .38 revolver na may kasamang apat (4) na bala.
Sa kabuuan, umabot sa 14 na sachets ng hinihinalang shabu ang nakuha mula sa mga arestado, na may humigit kumulang 70 gramo at may estimated Standard Drug Price na Php476,000.
Nasa himpilan na ngayon ng Iloilo City Police Station 2 ang mga suspek para sa dukomentasyon at nakatakdang sampahan ng mga kasong may paglabag sa Republic Act 9165 o ang “Comprehensive Dangerous Drugs Act of 2002”, at kasong paglabag sa Republic Act 10591 o ang “Comprehensive Firearms and Ammunition Regulation Act” laban kay Alyas “Gilbert” dahil sa natagpuang baril at bala.
Ang matagumpay na operasyon ay patunay ng dedikasyon ng kapulisan sa Iloilo sa paglaban sa ilegal na droga at kriminalidad.
Ito ay isang malaking tagumpay para sa Philippine National Police at isang hakbang patungo sa isang mapayapang Bagong Pilipinas.
Source: Ilonggo News Live
Panulat ni Pat Glydel V Astrologo
