Arestado ng Police Regional Office 6 (PRO6) ang isang drug personality, matapos makumpiska ang humigit-kumulang 70 gramo ng hinihinalang shabu na may estimated Standard Drug Price na PhP476,000.00 sa isinagawang buy-bust operation sa Brgy. Imbang Grande, Passi City, Iloilo, dakong 9:54 ng gabi noong Agosto 6, 2026.
Kinilala ang suspek sa alyas na “Inok/Gino,” 33 taong gulang, binata, residente ng Passi City, at nakatala bilang High-Value Individual (HVI).
Ang operasyon ay matagumpay na isinagawa ng Station Drug Enforcement Team ng Passi City Police Station kasunod ng masusing intelligence gathering, surveillance, target validation, at profiling.
Nasamsam sa suspek ang 14 na heat-sealed transparent plastic sachets na naglalaman ng hinihinalang shabu na may kabuuang timbang na humigit-kumulang 70 gramo, buy-bust money, at iba pang non-drug evidence.
Nahaharap ang suspek sa kasong paglabag sa Article II ng Republic Act No. 9165, o ang Comprehensive Dangerous Drugs Act of 2002.
Ayon kay PRO6 Regional Director, Police Brigadier General Randulf T Tuaño, patunay ang matagumpay na operasyon na nananatiling matatag at walang humpay ang kampanya ng PRO6 laban sa ilegal na droga.
“Ang matagumpay na operasyong ito ay nagpapakita ng ating matatag na paninindigan laban sa ilegal na droga. Hindi tayo titigil hangga’t hindi napapanagot ang mga taong patuloy na sumisira sa kinabukasan ng ating mga komunidad. Sa pamamagitan ng intelligence-driven operations at pakikipagtulungan ng publiko, patuloy nating bubuwagin ang mga lokal na drug network at pananatilihing ligtas ang Western Visayas,” pahayag ni PBGen Tuaño.
Binigyang-diin ng PRO6 na ang paglaban sa ilegal na droga ay sama-samang responsibilidad ng kapulisan at ng komunidad. Sa patuloy na pakikipagtulungan at pagbabahagi ng mapagkakatiwalaang impormasyon ng publiko, higit pang mapaiigting ang kampanya laban sa kriminalidad alinsunod sa layunin ng “Bagong PNP para sa Bagong Pilipinas: Serbisyong Mabilis, Tapat, at Nararamdaman.”
