Kalaboso ang isang 30-anyos na babae makaraang mahulihan ng malaking halaga ng ilegal na droga sa ikinasang buy-bust operation ng Manila Police District (MPD) nito lamang Biyernes, Mayo 17, 2024.
Kinilala ni PBGen Arnold Thomas Ibay, District Director ng MPD, ang suspek na si alyas “Farida”, tubong North Cotabato at residente sa Barangay 390. C.M. Recto Avenue sa naturang lungsod.
Ayon sa ulat ng MPD, ikinasa ng Station Drug Enforcement Unit (SDEU) ng MPD PS11 ang nasabing operasyon sa kahabaan ng Soler St malapit sa Rizal Avenue, Sta. Cruz, Maynila dahil sa pagkakasangkot sa malakihang transaksyon ng droga sa Binondo at Sta Cruz area.
Sa naturang operasyon, nasabat sa suspek ang dalawang pakete at dalawa pang knot-tied transparent plastic ice bags na naglalaman ng shabu na tinatayang may timbang na 700 gramo at nagkakahalaga ng Php4,760,000.
Narekober rin sa suspek ang isang genuine Php1,000 bill at 54 na piraso ng pekeng pera na ginamit bilang buy-bust money kasama ang isang BDO Cash Transaction Slip at isang laminated temporary national ID.
Kasalukuyang nasa kustodiya ng naturang prisinto ang suspek na nahaharap sa kasong paglabag sa Sec 5 at 11 Republic Act 9165.
Mas pinaiigting pa ng MPD PS11 ang kanilang kampanya kontra ilegal na droga upang matiyak ang isang ligtas na pamayanan.
Source: Police Big Brother
Panulat ni PSSg Remelin M Gargantos
