Virac, Catanduanes – Tinatayang Php367,200 halaga ng shabu ang nakumpiska sa isang lalaki na miyembro ng Sorreda Criminal Gang sa ikinasang buy-bust operation ng PRO5 sa Barangay Constatino, Virac, Catanduanes nito lamang Setyembre 21, 2022.
Kinilala ni Police Colonel Benjamin B Balingbing Jr., Provincial Director ng Catanduanes Police Provincial Office, ang suspek na si Rommel Sanchez, 35, binata, residente ng nabanggit na lugar at miyembro ng notoryos na Sorreda Criminal Gang ng probinsya ng Catanduanes.
Ayon kay PCol Balingbing Jr., bandang 7:05 ng gabi ng ikinasa ang operasyon ng pinagsanib na pwersa ng Regional Police Drug Enforcement Unit 5 (lead unit), Virac Municipal Police Station, Regional Intelligence Unit at Catanduanes Provincial Intelligence Unit.
Ayon pa kay PCol Balingbing Jr., narekober mula sa suspek ang pitong (7) sachet ng hinihinalang shabu na may kabuuang timbang na 54 gramo na may katumbas na halaga na Php367,200.
Nahaharap ang suspek sa kasong paglabag sa RA 9165 o ang Comprehensive Dangerous Drugs Act of 2002.
“Patuloy ang agresibong operasyon ng PNP Bicol upang matuldukan ang paglaganap ng ipinagbabawal na gamot sa rehiyon. We remain firm to this commitment and we shall endeavor in sustaining the momentum of creating a drug-free community for the people,” pahayag ni PBGen Rudolph B Dimas, Regional Director ng PRO5.
Source: KASUROG Bicol
Panulat ni Pat Rodel Grecia
