Tinatayang Php340,000 halaga ng shabu ang nasabat sa tatlong suspek sa ikinasang buy-bust operation ng mga operatiba ng Parañaque City Police Station nito lamang Huwebes, Abril 18, 2024.
Kinilala ni PBGen Mark Pespes, District Director ng Southern Police District, ang mga suspek na sina alyas “Nher,” 28; alyas “Anthony,” 48 at alyas “Benedict,” 53.
Naganap ang operasyon bandang 1:40 ng madaling araw na pinangunahan ng Parañaque City Police Station Drug Enforcement Unit kung saan nagresulta sa pagkakahuli sa tatlong suspek sa Barangay Tambo, Parañaque City.
Nasamsam ng mga awtoridad ang limang heat-sealed transparent plastic sachet na naglalaman ng puting crystalline substance na hinihinalang shabu na humigit-kumulang 50 gramo ang bigat at may Standard Drug Price na Php340,000, Php500 bill na ginamit bilang buy-bust money, at isang itim na pitaka.
Mahaharap ang tatlong suspek sa kasong paglabag sa Republic Act 9165 o Comprehensive Dangerous Drugs Act of 2002.
Puspusan naman ang SPD sa pagsugpo sa kalakaran ng ilegal na droga sa kanilang distrito upang makamit ang isang drug free na bansa tungo sa isang Bagong Pilipinas.
Source: SPD PIO
Panulat ni PSSg Remelin M Gargantos
