Nasamsam ng mga awtoridad ang humigit-kumulang 30 piraso ng tubular na tuyong dahon ng marijuana sa operasyon na isinagawa sa loob ng isang nakaparadang Toyota Fortuner sa Barangay Road, Housing Phase 2, Upper Wangal, La Trinidad, Benguet noong Hunyo 3, 2025.
Ayon kay Police Colonel Joseph P. Bayongasan, Provincial Director ng Benguet Police Provincial Office, pinangunahan ng La Trinidad Municipal Police Station ang operasyon, katuwang ang Provincial Drug Enforcement Unit (PDEU), Provincial Intelligence Unit (PIU) ng Benguet PPO, at ang Philippine Drug Enforcement Agency – Cordillera (PDEA-CAR).
Ang mga nakumpiskang kontrabando ay tumitimbang ng 30,000 gramo o 30 kilo at tinatayang nagkakahalaga ng Php3,600,000.
Nasamsam din ang 650 piraso ng pekeng Php1,000 bill at isang piraso ng pekeng Php500 bill.
Patuloy ang Benguet PNP sa pagpapaigting ng kampanya kontra ilegal na droga at kriminalidad upang masugpo ang paglaganap ng ipinagbabawal na gamot at mapanatili ang kapayapaan at kaayusan sa mga komunidad ng rehiyon.
