Nasamsam sa ikinasang buy-bust operation ng mga tauhan ng Philippine National Police at Philippine Drug Enforcement Agency BARMM ang hinihinalang shabu na may kabuuang halagang Php3.4 milyon at pagkakaaresto sa dalawang suspek sa Barangay Poblacion, Saguiaran, Lanao del Sur nito lamang ika-14 ng Enero 2025.
Kinilala ni Police Colonel Robert Daculan, Provincial Director ng Lanao del Sur Police Provincial Office, PDEA BARMM Regional Director Gil Cesario Castro ang mga suspek na sina alyas “Papad” at alyas “Adina” na matagal nang nasa radar ng mga awtoridad dahil sa umano’y pagkakasangkot sa pagbebenta ng iligal na droga sa nasabing lugar.
Nakumpiska ang isang transparent plastic sachet na naglalaman ng 500 gramo ng shabu na tinatayang nagkakahalaga ng Php3.4 milyon, isang Kawasaki Bajaj na may Plate number na 213KEF, isang black belt bag na naglalaman ng mga IDs at buy-bust money.
Ang dalawa ay nakatakdang sampahan ng kasong paglabag sa Republic Act 9165 o “Comprehensive Dangerous Drugs Act of 2002”.
Naging matagumpay ang operasyon dahil sa pagsisikap ng PNP Special Action Force, Saguiaran Municipal Police Station at PDEA Lanao del Sur Provincial Office.
Ang dedikasyon at koordinasyon ng mga operatiba ng PNP at PDEA sa matagumpay na operasyon ay mahalaga upang masugpo ang iligal na droga sa rehiyon na sanhi ng kriminalidad at pagkasira ng ating komunidad.
Panulat ni Patrolwoman Ma. Señora Agbuya
