Umabot sa Php3.4 milyong halaga ng shabu ang nakumpiska sa dalawang High Value Individual na maglive-in partner sa ikinasang drug buy-bust operation ng Iloilo City PNP sa Brgy. Magsaysay, Lapaz, Iloilo City, bandang 12:15 ng madaling araw, ika-24 ng Setyembre 2023.
Kinilala ni Police Colonel Joeresty Coronica, Hepe ng Iloilo City Police Office, ang mga naarestong sina alyas “Yhukan”, at si alyas “Bebe “.
Ayon kay PCol Coronica, agad na inaresto ang mga suspek matapos mabilhan ang mga ito ng isang pakete ng suspected shabu sa halagang Php18,000.
Ayon pa kay PCol Coronica, nakuha pa sa mga suspek ang limang (5) malalaking pakete at apat (4) na maliliit na plastic sachet na parehong naglalaman ng pinaniniwalaang shabu.
Narekober din sa kanila ang isang sling bag, isang android cellular phone, isang unit ng motorcycle Yamaha Mio, at proceeds money na nagkakahalaga ng Php2,000.
Tumitimbang ng 500 gramo na may tinatayang halaga na Php3,400,000 ang kabuuang nakuhang droga sa mga suspek.
Ang nasabing operasyon ay isinagawa ng pinagsanib na mga operatiba ng City Drug Enforcement Unit, Iloilo City Police Station 1, Iloilo City Police Statio 4, CGIGWV, at RPDEU, sa pakikipag-ugnayan sa PDEA 6.
Nahaharap ang maglive-in partner sa kasong paglabag sa RA 9165 o Comprehensive Dangerous Drugs Act of 2002.
Ang patuloy na pagsusumikap ng Pambansang Pulisya na labanan ang paglaganap ng ilegal na droga sa lungsod ay nagpapakita ng determinasyon upang tuluyan itong masugpo at mapanatili ang kaligtasan ng mamamayan mula sa mapanirang epekto ng ipinagbabawal na gamot.
