Mahigit Php29.41 milyong halaga ng marijuana ang sinira ng mga awtoridad sa magkakahiwalay na operasyon sa Mountain Province, Kalinga, Benguet at Ilocos Sur. Ayon sa ulat, layunin ng pinaigting na marijuana eradication operations na tuluyang buwagin ang mga pinagmumulan ng iligal na droga sa mga komunidad at maprotektahan ang mamamayan laban sa masamang epekto nito.
Sa hangganan ng Sadanga, Mountain Province at Tinglayan, Kalinga, umabot sa 50,000 fully grown marijuana plants at 40 kilo ng pinatuyong dahon at tangkay ng marijuana na nagkakahalaga ng Php14.8 milyon ang sinira ng mga operatiba.
Sa Barangay Badeo sa Kibungan, Benguet, binunot at winasak ang tinatayang 11,250 fully grown marijuana plants at 84 kilo ng pinatuyong dahon na may kabuuang halagang Php12.33 milyon. Samantala, 3,300 marijuana plants na nagkakahalaga ng Php660,000 ang inalis sa Kapangan, Benguet, at 8,100 halaman na may halagang Php1.62 milyon ang winasak sa Sugpon, Ilocos Sur. Patunay ito sa tuloy-tuloy na pagbabantay at agarang aksyon ng kapulisan laban sa iligal na droga sa iba’t ibang lalawigan.
Binigyang-diin ni PGen Jose Melencio Nartatez Jr., hepe ng Philippine National Police, na ang serye ng eradication operations ay malinaw na patunay ng matatag na paninindigan ng organisasyon laban sa iligal na droga.
“We will continue to work closely with our partner agencies and communities to sustain our efforts toward a drug-free Philippines,” ani PGen Nartatez.
Source: ₱29.41M in marijuana destroyed in 4 Northern Luzon provinces – PNP | GMA News Online
