Php18M halaga ng hinihinalang marijuana kush, nasamsam ng PNP sa Bacolod City; drug personality, arestado

0
540

Nasamsam ng mga operatiba ng Bacolod City Police Office (CPO) ang tinatayang 15 kilo ng hinihinalang high-grade marijuana kush na nagkakahalaga ng Php18 milyon sa isinagawang buy-bust operation noong Nobyembre 17, 2026, sa Brgy. Tangub, Bacolod City. Nagresulta ang operasyon sa pagkakaaresto ng isang 28-anyos na lalaki na isang drug personality.

Ayon sa ulat, narekober mula sa suspek ang humigit-kumulang 15 kilo ng hinihinalang marijuana kush na nakalagay sa ilang selyadong plastic bag, kasama ang buy-bust money at iba pang mahahalagang ebidensiya na gagamitin sa imbestigasyon. Tinatayang aabot sa Php18 milyon ang kabuuang halaga ng nasamsam na ilegal na droga batay sa Standard Drug Price (SDP).

Nahaharap ang suspek sa kasong paglabag sa Sections 5 at 11 ng Republic Act 9165 o Comprehensive Dangerous Drugs Act of 2002. Patuloy namang isinasagawa ng mga awtoridad ang kaukulang imbestigasyon upang matukoy ang iba pang posibleng sangkot at mapigilan ang patuloy na pagkalat ng ilegal na droga sa komunidad.

Binigyang-diin ni Chief PNP Police General Jose Melencio C Nartatez Jr. na mahalagang matukoy at masugpo hindi lamang ang mga indibidwal na sangkot sa ilegal na droga kundi pati ang mga pinagmumulan at daluyan ng suplay nito. Aniya, malaking hakbang ang pagkakasamsam ng ganitong karaming ilegal na droga upang mapigilan ang pagpasok nito sa merkado at mailayo ang mamamayan sa masamang epekto ng paggamit at pagbebenta ng ipinagbabawal na gamot.

Bahagi ang naturang operasyon ng patuloy na kampanya ng PNP laban sa ilegal na droga alinsunod sa PNP Focused Agenda, partikular sa Enhanced Managing Police Operations (EMPO), na nagtataguyod ng intelligence-driven operations at maayos na koordinasyon. Tiniyak naman ng PNP na magpapatuloy ang mga operasyong nakabatay sa mapagkakatiwalaang impormasyon at isinasagawa alinsunod sa batas, habang pinangangalagaan ang karapatan ng bawat indibidwal.

Source: PNP-PIO https://www.facebook.com/share/p/1EMcYFjqTJ/

Leave a Reply