Baao, Camarines Sur – Tinatayang nasa Php125,000 halaga ng ilegal na droga ang nasabat sa isang suspek sa pagsasagawa ng Search Warrant ng Baao PNP at Camarines Sur 2nd PMFC nito lamang Lunes, Hunyo 20, 2022.
Kinilala ni Police Major Divino John Pelea, Officer-in-Charge ng Baao Municipal Police Station ang suspek na si alyas “Waway”, 42, balo, residente ng Zone 1, Barangay San Nicolas, Baao, Camarines Sur at hinihinalang supplier ng ilegal na droga sa lugar.
Ayon kay PMaj Pelea, isinagawa ang Search Warrant bandang 7:00 ng umaga sa mismong bahay ng suspek ng pinagsanib na operatiba ng Baao MPS, Camarines Sur 2nd Provincial Mobile Force Company at sa pakikipag-ugnayan ng PDEA RO5.
Ayon pa kay PMaj Pelea, nakuha mula sa suspek ang 6 na piraso ng pakete ng hinihinalang shabu at marijuana na may timbang na 25 gramo na tinatayang may street market value na Php125,000 at mga drug parapernalya.
Ang suspek ay nahaharap sa kasong paglabag sa RA 9165 o ang Comprehensive Dangerous Drugs Act of 2002.
Ang himpilan ng Baao MPS ay patuloy na nananawagan sa publiko na makiisa at suportahan ang mga programa ng pulisya sa pamamagitan ng pagbibigay ng mga mahahalagang impormasyon na makakatulong sa pagsawata ng mga ilegal na aktibidad sa bayan upang makamit ang matahimik, mapayapa at maunlad na pamayanan.
###
