Nasamsam ang tinatayang Php108,000,000 halaga ng shabu mula sa dalawang suspek sa ikinasang buy-bust operation ng PNP at PDEA XIII sa Purok 1, Barangay Sta. Irene, Bayugan City, Agusan del Sur bandang 6:40 ng umaga noong Enero 27, 2025.
Kinilala ni Police Colonel Yaya B Yusop, Provincial Director ng Agusan del Sur Police Provincial Office, ang dalawang suspek na sina alyas “Octomar”, 32 anyos, residente ng Barangay Baan 3, Butuan City, Agusan del Norte at alyas “Janray”, 22 anyos, residente ng Poblacion 2, Tubay, Agusan del Norte.
Sa operasyon, narekober ang kabuuang 16 kilo ng shabu na may tinatayang halaga na Php108,000,000, dalawang plastic bag na naglalaman ng 2 kilo ng shabu na nagkakahalaga ng Php2,000,000, karagdagang 14 kilo ng shabu; dalawang Realme C33 Android Phones (brown); limang digital weighing scale at iba pang drug paraphernalia.
Ang matagumpay na operasyon ay pinangunahan ng Philippine Drug Enforcement Agency XIII, katuwang ang Agusan del Sur PNP at Bayugan City PNP.
Mahaharap ang mga suspek sa kasong paglabag sa Sections 5 at 11 ng Article II ng Republic Act 9165, o ang “Comprehensive Dangerous Drugs Act of 2002”.
Patuloy na pinaiigting ng PNP at PDEA Caraga ang kampanya laban sa malakihang bentahan ng droga upang mapanatili ang kapayapaan at seguridad, at upang mapabilis ang pagtugis sa mga sindikato ng droga sa bansa.
Panulat ni Pat Karen Mallillin
