Naaresto ng mga operatiba ng Caloocan City Police Station ang isang High Value Individual (HVI) at dalawang babaeng suspek sa ikinasang buy-bust operation sa Phase 5A, Package 3, Bagong Silang, Barangay 172, Caloocan City nito lamang Lunes, Marso 3, 2025.
Pinangalanan ni Police Colonel Josefino D. Ligan, Acting District Director ng Northern Police District (NPD), ang mga naarestong suspek na sina alyas “Michael”, isang 44-anyos na lalaki; alyas “Cherry”, isang 35-anyos; at alyas “Marjorie’, 27-anyos, na kapwa mga residente ng Caloocan City.
Ayon kay PCol Ligan, isinagawa ng Station Drug Enforcement Unit (SDEU) ang operasyon na humantong sa pagkakakumpiska ng humigit-kumulang 1,000 gramo ng high-grade Kush na nagkakahalaga ng Php1,400,000 at 2,170 gramo ng pinatuyong dahon ng marijuana na nagkakahalaga ng Php260,400, buy-bust money, at drug paraphernalia,
Mahaharap ang mga naarestong suspek sa kasong paglabag sa Sections 5, 26, at 11 ng Article II ng Republic Act 9165, na kilala rin bilang “Comprehensive Dangerous Drugs Act of 2002”.
Hinihikayat ng Northern Police District ang publiko na manatiling mapagbantay at iulat ang anumang kahina-hinalang aktibidad sa mga awtoridad upang mapanatili ang kaunlaran at kaligtasan tungo sa isang Bagong Pilipinas.
Source: NPD PIO
Panulat ni PMSg Gargantos, Remelin M
