Cupang, Muntinlupa City — Tinatayang mahigit Php1.3 milyong halaga ng shabu ang nasabat sa apat na suspek sa buy-bust operation ng Muntinlupa PNP nito lamang Miyerkules, Marso 9, 2022.
Kinilala ni Police Brigadier General Jimili Macaraeg, District Director ng Southern Police District ang mga suspek na sina Glenn De Guzman y Delos Reyes alyas “Glenn”, 38; Mayline Rodolfo y Cipriano, 41; Anthony Pasion y Santos, 39; at Christopher Bayangos y Candelario, 20, na pawang mga residente ng Muntinlupa City.
Ayon kay PBGen Macaraeg, bandang 9:40 ng gabi naaresto ang mga suspek sa Garcia Compound, Brgy. Cupang, Muntinlupa City sa pinagsanib puwersa ng Station Drug Enforcement Unit ng Muntinlupa City Police Station at PDEA.
Ayon pa kay PBGen Macaraeg, nakumpiska sa kanila ang isang medium heat-sealed transparent plastic sachet; isang buhol na transparent plastic sachet, 10 medium heat-sealed transparent plastic sachets, at tatlong small heat-sealed transparent plastic sachet na puro naglalaman ng white crystalline substance na pinaghihinalaang shabu, isang brown sling bag, at Php4,000 buy-bust money.
Ang mga nasabat na substance ay tumitimbang ng mahigit kumulang 200 gramo at may halagang Php1,360,000.
Nahaharap sa kasong paglabag sa Sec 5 at 11, Art II ng RA. 9165 o Comprehensive Dangerous Drugs Act of 2002 ang mga suspek.
“Binabati ko ang ating mga pulis sa Muntinlupa sa pagkakadakip sa mga suspek at pagkakakumpiska ng milyong halaga ng hinihinalang shabu. Sa ilalim ng aking panunungkulan ay hindi ko hahayaang gawing pugad ng ilegal na aktibidad ang Katimugang Metro. Kami po ay hindi titigil bagkus mas palalawigin pa namin ang aming operasyon nang sa gayon ay mapagtagumpayan natin ang lahat ng ito”, dagdag pa ni PBGen Macaraeg.
Source: SPD PIO
###
