Masusing tinututukan ng mga tauhan ng Angeles City Police Office ang insidente na kung saan natagpuang patay ang dalawang bata sa loob ng isang sasakyan sa Sitio Cuayan Hensonville, Barangay Malabanias, Angeles City nito lamang ika-22 ng Marso 2024.
Kinilala ni Police Major Vicky C Tamayo, Acting Station Commander, Police Station 4 Angeles CPO, ang mga biktima na sina Darriel A Ibañez, 3 anyos at Marvin Miles Bula, 2 anyos na parehong residente ng nasabing lugar.
Ayon sa ulat, iginarahe ng driver na kinilalang si Fermhan Pamintuan, 33 anyos, ang sasakyan na Toyota Vios na kulay maroon sa harap ng bahay ng amo nito.
Laking gulat umano niya nang balikan nito ang sasakyan at dito na tumambad ang dalawang bata na wala ng buhay kung saan agad naman siyang humingi ng saklolo sa mga awtoridad.
Sa kuha ng CCTV sa lugar, bandang 9:23 ng umaga namataang naglalaro ang dalawang biktima sa lugar at maya-maya nga ay pumasok sa nakaparadang sasakyan. Dito na nakulong ang mga ito hanggang sa hindi na makahinga at tuluyang binawian ng buhay.
Kaugnay nito, masusing iniimbestigahan ang pinangyarihan ng insidente at sumailalim na rin sa autopsy ang mga biktima na kung saan lumabas na namatay ang mga ito dahil sa suffocation dulot ng apat na oras na pagkakakulong sa loob ng sasakyan.
Patuloy naman ang pagbibigay paalala ng mga awtoridad sa mga magulang na bantayan mabuti ang kanilang mga anak upang maiwasan ang ganitong mga insidente.
Panulat ni Pat Jilly Peña
