Tinatayang Php1,200,000 halaga ng marijuana ang sinunog ng Kalinga PNP sa isinagawang marijuana eradication sa Barangay Ngibat, Tinglayan, Kalinga nito lamang ika-14 ng Pebrero 2024.
Ayon kay Police Colonel Freddie M Lazona, Provincial Director ng Kalinga Police Provincial Office, ang operasyon ay nagresulta sa pagkadiskubre ng plantasyon ng marijuana na may tinatayang lawak na 400 square meters at may tanim na 6,000 piraso ng fully grown marijuana plants na nagkakahalaga ng tinatayang Php1,200,000.
Bagamat walang nahuling cultivator, lahat ng nasabing halaman ng marijuana ay binunot at sinunog sa mismong lugar.
Naging matagumpay ang operasyon sa pagsisikap ng pinagsanib na pwersa ng mga kapulisan sa pangunguna ng 2nd Kalinga Provincial Mobile Force Company, kasama ang mga tauhan ng Tinglayan Municipal Police Station, Provincial Drug Enforcement Unit at Philippine Drug Enforcement Agency-Kalinga.
Pinuri naman ni PCol Lazona ang mga operatiba sa kanilang matagumpay na operasyon at titiyakin na lalo pa nilang paiigtingin ang kanilang kampanya kontra sa ilegal na droga upang matuldukan ang paglaganap ng pinagbabawal na halaman sa kanilang nasasakupan.
Ang pagpuksang ito ng kapulisan ay bilang pagsuporta sa isinusulong ng Pangulong Ferdinand R. Marcos, Jr. na Whole-of-the-Nation Approach upang mabawasan o tuluyang mawala ang paglaganap ng ilegal na droga sa mga barangay at komunidad.
Panulat ni Pat Liezle Digman
