Pormal nang nanumpa at pumirma ng boluntaryong pagsuko ang dalawang dating miyembro ng Anakbayan
sa Conference Room ng Valenzuela City Police Station, Valenzuela City nito lamang Miyerkules, Abril 17, 2024.
Kinilala ni Police Colonel Salvador S Destura Jr, Chief of Police ng Valenzuela CPS, ang mga sumuko na sina alyas “Anie”, 23, at “Reylin”, 25, apat na taon at tatlong taong miyembro ng Anakbayan na kapwa residente ng Valenzuela City.
Ayon sa mga sumuko na napagpasyahan nilang bawiin ang kanilang suporta at pagiging miyembro sa grupo matapos mapagtanto na walang hinaharap sa kanilang pakikibaka. Dagdag pa nila, nanghinayang sila sa pagsali sa grupong Anakbayan.
Nagsagawa ng special intelligence operation ang Valenzuela City Police at Joint Task Force (JTF)-NCR na nagresulta sa boluntaryong pag-withdraw ng suporta, ayon kay PMaj Randy Llanderal, hepe ng Valenzuela City Station Intelligence Section.
Dumalo din sa programa at nagpakita ng suporta sa “Balik-Loob Program,” sina PBGen Rizalito G Gapas, NPD Director; PCol Alex C Daniel, Chief, DID, NPD; at iba pang mga Barangay Officials.
Sa presentasyon at oath-taking ng mga sumuko, nakatanggap ang dalawa ng grocery packs, cash at livelihood assistance mula sa ating pamahalaan.
“Nagpapasalamat kami sa mga pulis ng Valenzuela sa pag-udyok sa amin na magbalik-loob at sa tulong nila sa amin. Sana ay matulungan din sila gaya namin,” saad ng dalawang sumuko.
Sa kanyang mensahe, ipinaliwanag ni PCol Destura Jr, ang “Balik-loob Program”, at pinuri ang desisyon ng dalawa na sumuko at sa pagtupad sa kanilang alok ng kapayapaan.
“Napakaganda ng umaga na ito dahil muli tayong hinihikayat na magbalik-loob. Mula sa mismong salita, balik-loob, ang ibig sabihin ay babalik sila sa kanilang normal na pamumuhay na malayo sa mapanghimagsik na pag-iisip. Babalik sila sa panig ng kapayapaan, sa panig ng ating gobyerno,” aniya.
Source: Valenzuela City Police Station
Panulat ni PSSg Remelin M Gargantos
