Davao City – Arestado ang isang lalaki matapos makuhaan ng matataas na kalibre ng baril sa checkpoint na isinagawa ng mga tauhan ng Toril PNP at Task Force Davao sa Brgy. Sirawan, Toril Davao City, noong Setyembre 7, 2022.
Kinilala ni PMaj Carol Jabagat, Station Commander ng Toril Police Station, ang suspek na si alyas “Mohammad”, 26, residente ng Brgy. Poblacion, Matalam, North Cotabato na nagpakilalang miyembro ng Philippine Army.
Ayon kay PMaj Jabagat, naaresto ang suspek matapos dumaan at parahin sa isinagawang checkpoint ng pinagsamang tauhan ng Task Force Davao at Toril PS upang inspeksyunin ang kanilang sasakyan at mga dala at doon nakita ng mga otoridad ang matataas na kalibre ng baril.
Dagdag pa ni PMaj Jabagat, nakuha mula sa suspek ang pitong matataas na kalibre ng baril na may kasamang 64 na bala.
Ang suspek ay nahaharap sa kasong paglabag sa Republic Act 10591 o Comprehensive Firearms and Ammunition Regulation Act.
Nagbabala naman ang Police Regional Office 11 na huwag magdala ng baril o anumang armas na hindi otorisado at walang kaukulang dokumento dahil ito ay labag sa batas at may katapat na kaparusahan.
Panulat ni Patrolman Alfred Vergara
