Davao City – Tinatayang Php1,524,960 halaga ng hinihinalang shabu ang nasabat sa Top 5 regional level wanted person sa isinagawang buy-bust operation ng PNP at PDEA sa Km. 28 National Highway Lasang, Davao City, noong Agosto 11, 2022.
Kinilala ni PMaj Milan Naz, Station Commander ng Bunawan PS, ang suspek na si Mark Alvin Asarcon Gamale alyas “Popoy”, 38, residente ng Km. 13 Zone 2 Panacan, Davao City na tinaguriang Top 5 regional level wanted person.
Ayon kay PMaj Naz, naaresto ang suspek sa isinagawang buy-bust operation ng Drug Enforcement Unit ng Bunawan PS kasama ang 1105th Maneuver Company-Regional Mobile Force Battalion 11, City Intelligence Unit at City Drug Enforcement Unit at sa pakikipagtulungan ng PDEA XI.
Dagdag pa ni PMaj Naz, nakuha sa suspek ang ilang pakete ng hinihinalang shabu na may bigat na humigit kumulang 95.31 gramo na may tinatayang street market value na Php1,524,960 at isang unit .45 caliber na may serial no. 453312 at anim na live ammunitions, at marked money na ginamit sa operasyon.
Ang suspek ay nahaharap sa kasong paglabag sa Republic Act 9165 o Comprehensive Dangerous Drugs Act of 2002 at Republic Act 10591 o Comprehensive Firearms and Ammunition Regulation Act.
Pinuri naman ni PBGen Benjamin Silo Jr., PRO11 Regional Director ang nasabing operasyon dahil sa matagumpay na pagkakadakip sa suspek na lalong maglalapit sa kanilang layunin na gawing drug-free ang rehiyong onse.
###
Panulat ni Patrolman Alfred Vergara
