Benguet – Personal na binisita at binigyang pugay ni Police Brigadier General David Peredo Jr, Regional Director ng Police Regional Office Cordillera, ang huling hantungan ng isa sa mga The Gallant SAF 44 na nakahimlay sa Pyramid Memorial Park Cemetery sa Buyagan, La Trinidad, Benguet nito lamang Nobyembre 1, 2023.
Ipinagdasal at ipinagtirik ng kandila ni PBGen Peredo Jr si Police Officer 2 Peterson Carap ng PNP Special Action Force, bilang pag-alala at pagbigay galang sa kanyang serbisyo at sakripisyo upang mapanatili ang katahimikan sa ating bansa.
Si PO2 Carap ay isa sa mga bayani ng SAF 44 na binawian ng buhay sa isang high-risk special operation sa isang liblib na lugar ng Mamasapano sa Maguindanao noong Enero 25, 2015 upang tugisin ang grupo ni Zulkifli bin Hir alyas “Marwan”, na namatay din sa naturang operasyon.
Sa 44 na pulis, 14 nito ay mula sa rehiyon ng Cordillera na nagpakita ng lakas ng loob at isinakripisyo ang kanilang sarili para sa katahimikan at matuldukan ang terorismo sa ating bayan.
Samantala, kinilala ni PBGen Peredo Jr., ang katapangan at tatag ng loob ng kanyang mga kababayan at kabaro na kabilang sa SAF44 at tinitiyak nitong hindi masasayang ang kanilang buhay na isinakripisyo para sa hinahangad na kapayapaan.
