Davao City – Patay ang isang lalaki matapos mabaril sa isang bar sa Esquena de Tavera Corner V. Mapa at J.Camus Extension, Davao City, madaling araw ng Hulyo 2, 2022.
Kinilala ni PMaj. Benkalin Baluan, Chief of Police, San Pedro Police Station, ang suspek na si Marvin Rey Andrew Pepino, 31, PNP Non-Uniformed Personnel at Doktor na nakatira sa Phase 1, Block 4, Sapphire Street, Hillside, Bajada, Davao City.
Habang ang biktima naman ay kinilalang si Amir Mangacop, 21, residente naman ng El Rio Subdivision, Bacaca, Brgy. 19B, Davao City.
Sa inisyal na imbestigasyon ng San Pedro PNP, nangyari ang insidente bandang 12:50 kaninang madaling araw kung saan nagkaroon ng riot ang ilan sa mga bar goers.
Nagtamo ang biktima ng mga tama ng bala sa iba’t ibang parte ng kanyang katawan dahilan ng pagkamatay nito, dinala pa ito sa ospital ngunit idineklara itong dead on arrival.
Narekober naman sa crime scene ang anim na basyo ng bala ng 9mm Glock pistol.
Mahaharap sa kasong homicide ang suspek na kasalukuyang nasa kustodiya na ng San Pedro PNP.
Siniguro naman ng pamunuan ng Pulis Rehiyon Onse na hindi ito makikialam sa imbestigasyon kahit na isa sa mga personahe ng PRO11 ang suspek, isa lamang itong patunay na walang kinikilingan ang ating PNP maging sinuman ang suspek o biktima.
###
Panulat ni Police Corporal Romulo Cleve Ortenero
