Matagumpay na ginanap ang inauguration at Blessing ng Balay Silangan sa bayan ng Tayug, Pangasinan noong Hunyo 8, 2026, na dinaluhan ni PLtCol Richard Q. Agrade, Force Commander ng Pangasinan 2nd Provincial Mobile Force Company (PMFC), kasama ang iba pang opisyal ng pamahalaan, mga lokal na lider, at mga stakeholder na patuloy na sumusuporta sa mga programang pangrehabilitasyon, reintegrasyon, at pangkaunlaran para sa komunidad.
Ang Balay Silangan ay nagsisilbing simbolo ng pag-asa, pagbabago, at ikalawang pagkakataon para sa mga indibidwal na nagnanais magbagong-buhay at maging produktibong miyembro ng lipunan. Sa pamamagitan ng pasilidad na ito, mabibigyan ang mga benepisyaryo ng mga programang nakatuon sa pagpapaunlad ng kanilang disiplina, pagpapahalaga sa sarili, at pananagutan sa komunidad upang tuluyang makabalik sa maayos at makabuluhang pamumuhay.
Ipinapakita ng proyektong ito ang matibay na ugnayan at pagtutulungan ng mga ahensya ng pamahalaan, lokal na pamahalaan, at iba’t ibang sektor ng lipunan sa pagsusulong ng isang mas ligtas, mas maayos, at drug-free na komunidad. Patunay ito na ang rehabilitasyon at reintegrasyon ay mahalagang bahagi ng pagpapanatili ng kapayapaan at kaayusan sa bansa.
Sa opisyal na pagbubukas ng Balay Silangan, inaasahang magsisilbi itong tanglaw ng pag-asa at pagbabago para sa mga benepisyaryo, na gagabay sa kanila tungo sa isang kinabukasang may dignidad, layunin, at mas maraming oportunidad.
Sa pamamagitan ng pagkakaisa, malasakit, at pakikipagtulungan ng lahat ng sektor, patuloy na naitataguyod ang mas matatag, ligtas, at maunlad na mga komunidad, kaakibat ang patuloy na pagsasabuhay ng adhikain ng “Bagong PNP para sa Bagong Pilipinas: Serbisyong Mabilis, Tapat, at Nararamdaman.”
Panulat ni PMSg Carmela G Danguecan
Source: 2nd PMFC Pangasinan
