Nakilahok ang kapulisan ng Ilocos Norte sa pag-aalay ng bulaklak sa pagdiriwang ng ika-105 taon ng kapanganakan ni dating Pangulong Ferdinand Edralin Marcos, Sr. na ginanap sa lungsod ng Batac, Ilocos Norte nito lamang ika-11 ng Setyembre 2022.
Pinangunahan ni Senator Imee Marcos, Gobernador Matthew Marcos Manotoc at First Lady Atty. Liza Marcos ang isinagawang Wreath laying Ceremony sa City of Batac bilang paggunita sa ika-105 taon ng Pagdiriwang ng Kaarawan sa Monumento ni dating Pangulong Ferdinand E. Marcos Sr.
Dumalo sa programa si Police Brigadier General Belli B. Tamayo, Acting Regional Director, Police Regional Office 1 bilang pakikiisa ng PNP sa lokal na pamahalaan.
Isinagawa naman ng Ilocos Norte Police Provincial Office ang Marching Honor nito sa harap ng bantayog ng Marcos Monument sa Batac, Ilocos Norte na pinangunahan naman ni Police Lieutenant Colonel Randy Baoit, Deputy Provincial Director for Operations, Ilocos Norte PPO kasama ang mga miyembro ng Command Group, P-Staff at mga tauhan ng Provincial Mobile Force Company – Ilocos Norte.
Samantala, dumalo rin si Pangulong Ferdinand R. Marcos Jr. sa pagdiriwang ng ika-105 taon ng kapanganakan ng kanyang yumaong ama.
Sa kanyang talumpati, ang Pangulo ay nagpahayag ng kanyang pasasalamat sa lahat ng mga Ilokano sa kanilang patuloy at magiliw na alaala sa kanyang ama taon-taon.
“Ang pasasalamat ko ay hindi lang para sa araw na ito. Ang pasasalamat ko sa inyo sa loob ng maraming taon na hindi ninyo kami iniwan,” dagdag nito.
“Ito ay muling pagsilang hindi marahil sa pisikal na katawan ni Ferdinand Marcos Sr., ngunit muling pagsilang ng kanyang mga pangarap, kanyang karunungan, ng kanyang pagmamahal sa bansang ito. Panatilihin nating buhay ang apoy na iyon. Ito ay muling isilang. Panatilihin natin itong malakas at maliwanag na gabayan tayo sa lahat ng ating gagawin sa hinaharap,” ani Pangulong Ferdinand “Bong Bong” Marcos Jr.
Source: Ilocos Norte Police Provincial Office
Panulat ni PSSg Lhenee B Valerio
