Bacolod City – Tinatayang aabot sa Php5,440,000 halaga ng droga ang nasabat ng Bacolod City PNP sa ikinasang buy-bust operation sa Purok Villa Lourdes, Barangay Pahanocoy, Bacolod City kaninang umaga ng alas-1:56 nitong ika-18 ng Hunyo 2023.
Inilunsad ang drug buy-bust operation ng pinagsamang mga tauhan ng Bacolod City Police Station 8 at Special Operations Unit 6 ng PNP Drug Enforcement Group na nagresulta sa pagkakadakip ng High Value Individual na suspek.
Kinilala ni Police Colonel Noel Aliño, Hepe ng Bacolod City Police Office ang drug suspek na si alyas “Ombap”, 26, may asawa, walang trabaho, at residente ng nabanggit na barangay.
Ayon kay PCol Aliño, narekober kay alyas “Ombap” ang 11 piraso na malalaking pakete na naglalaman ng suspected shabu, kabilang ang buy-bust item at 7 piraso ng knot-tied transparent plastic sachet na naglalaman din ng pinaniniwalaang shabu na may kabuuang timbang na aabot sa 800 gramo.
Maliban sa droga, nakumpiska din sa drug suspek ang isang digital weighing scale, isang color blue na sling bag, at 3 piraso ng genuine one thousand peso bill na ginamit bilang buy-bust money.
Ang matagumpay na Anti-Illegal Drug Operation ay resulta ng mahusay at mas pinaigting na kampanya ng Police Regional Office 6 sa ilalim ng pamumuno ni PBGen Sidney N Villaflor, laban sa ilegal na droga at sa lahat ng uri ng kriminalidad upang mapanatili ang maayos at maunlad na Western Visayas.
