Tuguegarao City, Cagayan – Nagwagi ng gintong medalya ang hepe ng Ballesteros PNP sa isinagawang Dangal ng Lahing Cagayano Search bilang parte ng selebrasyon ng Aggao Nac Cagayan sa Cagayan Coliseum, Tuguegarao City, Cagayan nito lamang Hunyo 28, 2022.
Napili si PMaj Marlou U Del Castillo at tinalo ang 50 nominees sa ilalim ng Peace and Order Category.
Dahil dito, gumawa siya ng isang kasaysayan bilang kauna-unahang Cagayano Cop na naparangalan ng naturang pagkilala simula ng ito ay ilunsad noong taong 2017.
Nakilala si PMaj Del Castillo sa kanyang hindi matatawarang dedikasyon sa pagtulong sa mga lubos na nangangailangan at tunay na malasakit sa mga Cagayano.
Ilan sa mga tumatak na proyekto niya ay ang Project B.I.K.E o Bisikleta Ihahandog sa Kapatid na Aeta kung saan namigay ang kanilang himpilan ng libreng bisikleta na may kasamang panindang mga gulay sa benepisyaryo nitong katutubo.
Hindi din makakalimutan ang tanyag na Christmas Tree ng Ballesteros PNP na gawa sa mga sira-sirang parte ng motorsiklo na naging atraksyon hindi lang sa mamamayan ng Ballesteros kundi sa buong lalawigan ng Cagayan.
Bukod pa dito, siniguro niyang komportable ang mga kliyente na pupunta sa kanilang himpilan kaya ipinagawa niya ang Visitors lounge na tinawag nilang Pamana Client Lounge na may makabagong disenyo ng Comfort Rooms.
May libreng kape din ang mga bumibisita na kasing init ng pagmamahal at pagtanggap nila sa mga ito.
Samantala, pinuri naman ni Police Colonel Renell R Sabaldica si PMaj Del Castillo sa kanyang tagumpay.
Hinimok din niya ang mga Cagayano Cops na gawin itong modelo at pag-igihan ang kanilang serbisyo sa publiko.
Source: Cagayan Police Provincial Office
###
Panulat ni Police Staff Sergeant Mary Joy D Reyes
