Nasabat ng Lapu-Lapu City PNP ang halos Php7 milyong halaga ng hinihinalang shabu mula sa isang High Value Individual sa inilunsad na buy-bust operation sa Sitio Seaside, Barangay Pajo, Lapu-Lapu City, Cebu nito lamang Lunes, Enero 27, 2025.
Kinilala ni Police Colonel Dyan V Agustin, Acting City Director ng Lapu-Lapu City Police Office, ang suspek na si alyas “Rex”, 45 taong gulang, residente ng Purok Bangan, Barangay Cabancalan, Mandaue City, Cebu.
Dakong alas 9:49 ng gabi nang magsagawa ng operasyon ang operatiba ng City Intelligence Unit / City Drug Enforcement Unit, Lapu-Lapu City Police at nasabat sa suspek ang 13 pakete ng hinihinalang shabu na aabot sa 1,025 gramo at may Standard Drug Price na Php6,970,000, back pack at eco bag na ginamit bilang lagayan ng mga iligal na droga, Nokia cellular phone, at buy-bust money.
Mahaharap ang suspek sa kasong paglabag sa Section 5 and 11, Article II ng Republic Act 9165 o ang “Comprehensive Dangerous Drugs Act of 2002”.
Ang matagumpay na operasyon ay patunay lamang na ang mga kapulisan ng Lapu-Lapu City ay nagpapakita ng kanilang kakayahan at kasanayan sa pagsugpo ng iligal na droga at pagprotekta sa kaligtasan at kaayusan ng mamamayan para sa isang mapayapa na Bagong Pilipinas.
