Pampanga – Arestado ang isang babae matapos ang ikinasang entrapment operation ng mga tauhan ng Angeles Police Station 3 dahil umano sa Ghost Housing Project modus nito sa Phase 9, Brgy. Pulung Cacutud, Angeles City, Pampanga nito lamang ika-29 ng Enero 2024.
Kinilala ni Police Major Mark Neil Mautin, Station Commander ng Angeles Police Station 3, ang suspek na si alyas “Tess”, residente ng Barangay Cutud, Angeles City, Pampanga.
Ang naturang suspek ay nagpakilalang empleyado ng Angeles City Hall at nag-alok ng proyektong pabahay sa nagreklamong biktima na si alyas “Pong”, residente ng Porac, Pampanga.
Ang biktima ay nagbayad ng processing fee na nagkakahalaga ng Php2,300 at monthly amortization na Php1,499.
Ayon sa ulat, naghinala na umano ang biktima nang napansin nitong mga peke pala ang mga dokumento na ibinigay ng suspek.
Napag-alaman niyang hindi na pala empleyado ng City Hall ang suspek at hindi lehitimo ang naturang proyekto kaya agad-agad siyang nagreklamo sa mga awtoridad.
Nahaharap ang suspek sa patong-patong na kaso ng Robbery Extortion, Estafa, Usurpation of Authority, at Falsification of Public Documents.
Patuloy naman ang Angeles PNP sa pagtugis sa mga indibidwal na may hangaring makapanlinlang sa kanilang kapwa.
Panulat ni Pat Jilly A Peña
