Arestado ng mga tauhan ng Quezon City Police District ang isang lalaking empleyado ng City Hall na suspek sa insidente ng Robbery Extortion nito lamang Sabado, Marso 23, 2024.
Kinilala ni Police Major General Jose Melencio C Nartatez Jr, Regional Director ng NCRPO, ang suspek na si Joel, 56 taong gulang, may asawa, supervisor ng QC Engineering Office, at residente ng Sun Valley Subdivision, Cogeo, Antipolo City.
Ayon sa ulat, dakong 8:00 ng gabi naganap ang entrapment operation laban sa suspek dahil sa paulit ulit nitong pangingikil ng malaking pera sa biktimang isang Business Owner.
Pinangunahan ng mga operatiba ng Criminal Investigation and Detection Unit ng QCPD ang operasyon sa Army Navy Restaurant na matatagpuan sa kahabaan ng Visayas Avenue, Barangay Vasra, Quezon City na nagresulta sa pagkakaaresto ng suspek.
Nakuha sa possession at control ng mga suspek ang entrapment money (limang piraso ng isang libong pisong perang papel) at isang BDO check na may halagang Php700,000.
“Ang mabilis na pagkilos ng ating mga operatiba ay nagresulta sa pagkahuli ng suspek. Nais naming paalalahanan ang publiko na sa mga sitwasyon kung saan nakakaramdam ka ng pananakot o pilit na pagbabayad ng pera nang labag sa batas, huwag mag-atubiling makipag-ugnayan sa iyong kapulisan. Makatitiyak na kikilos ang NCRPO sa inyong mga ulat habang nananatili kaming matatag sa aming pangako na arestuhin ang mga kriminal, kabilang ang mga sangkot sa pagnanakaw at pangingikil,” ani PMGen Nartatez.
Source: RPIO NCRPO
Panulat ni PSSg Remelin M Gargantos
