Camarines Norte – Arestado ang isang lalaki matapos makuhanan ng droga, baril at mga bala sa inilunsad na Search Warrant Operation ng pinagsamang mga operatiba ng Camarines Norte PNP sa Purok 1, Barangay Motherlode, Jose Panganiban, Camarines Norte nito lamang Hulyo 18, 2023.
Kinilala ni Police Major Herson Manegdeg, Hepe ng Jose Panganiban MPS, ang arestado na si alyas “Den”, 43, may kinakasama, residente sa Jose Panganiban, Camarines Norte.
Ayon kay PMaj Manegdeg, isinagawa ang paghahain ng Search Warrant No. D-16-2023 bandang 11:20 ng tanghali ng pinagsanib na mga operatiba ng Jose Panganiban MPS, RPDEU, PDEU at Camarines Norte-PIU sa pakikipag-ugnayan sa PDEA-Camarines Norte Provincial Office.
Nakumpiska mula sa suspek ang isang (1) yunit ng 38 rebolber na may trademark na Shooters na walang serial number at kargado ng tatlong (3) bala at apat (4) na piraso ng plastic sachet ng hinihinalang shabu na may timbang na anim (6) na gramo at may street value na Php40,800.
Mahaharap ang suspek sa kasong paglabag sa R.A. 9165 o ang Comprehensive Dangerous Drugs Act of 2002 at RA 10591 o ang Comprehensive Firearms and Ammunition Regulation Act.
Patuloy ang Jose Panganiban PNP sa pinaigting na kampanya laban sa ilegal na droga at iba pang krimen at hinihikayat ang mga mamamayan na makipagtulungan sa otoridad upang mapanatili ang kaayusan at katahimikan sa kanilang nasasakupang lugar.
Source: Jose Panganiban MPS Cnppo
