Nagpakita ng matapang na hakbang ang isa sa mga dating tagasuporta ng makakaliwang grupo sa Isabela matapos sumuko at magbigay ng mahalagang impormasyon at materyal sa mga tauhan ng 1st Integrated Provincial Mobile Force Company sa Camp Lt Rosauro D Toda Jr, Barangay Baligatan, City of Ilagan, Isabela nito lamang ika-27 ng Marso 2024.
Kinilala ni Police Lieutenant Colonel Ruben M. Martinez, Force Commander ng 1st IPMFC, ang sumuko na si alyas “Egie”, 39 at residente ng San Mariano, Isabela.
Sa isang seremonya sa Camp Lt. Rosauro D. Toda Jr., Barangay Baligatan, Ilagan City, Isabela, ipinakita ni alyas “Egie” ang kanyang suporta sa pamamagitan ng pag-abot ng mga armas at iba pang kagamitan ng tracker team.
Kasama sa kanyang mga isinuko ang isang revolver, rifle grenade, at iba pang kagamitan na magagamit sa mga operasyon ng mga makakaliwang grupo.
Ayon kay PCol Lee Allen B. Bauding, ang Provincial Director ng Isabela Police Provincial Office (IPPO), ang pagbibigay-katuparan sa mga proyektong anti-insurgency tulad ng Project WILL at Project SUBLI ay nakatulong upang mabawasan ang suporta ng rebelde sa lugar.
Dagdag pa niya, ang patuloy na koordinasyon at negosasyon sa mga dating rebelde ay nagpapakita ng epektibong hakbang ng pamahalaan upang mapanatili ang kapayapaan at kaayusan sa lalawigan.
Samantala, sa pagtanggap ng mga awtoridad sa mga armas at impormasyon mula kay Egie, ito ay magiging malaking tulong sa pagpapalakas ng seguridad at pagpapabuti ng kalagayan sa Isabela laban sa terorismo at rebelyon.
Ang kanyang pagpapakumbaba at pakikilahok sa mga programa ng pamahalaan ay nagpapakita ng tamang direksyon sa pagtataguyod ng kapayapaan at kaunlaran sa rehiyon.
Source: PNP Isabela
Panulat ni Patrolwoman Wendy Rumbaoa
