Arestado ang dalawang indibidwal sa pagbebenta ng ilegal na armas sa isinagawang firearms buy-bust operation ng mga otoridad sa Barangay Tambo, Sultan Mastura, Maguindanao del Norte nito lamang ika-15 ng Oktubre 2024.
Kinilala ni Police Lieutenant Colonel Ariel T Huesca, Regional Chief ng Criminal Investigation and Detection Group – Regional Field Unit BAR ang mga naarestong suspek na sina alyas “Ismail” at alyas “Rivas” na pawang mga residente ng naturang lugar.
Ayon kay PLtCol Huesca, naging matagumpay ang ikinasang operasyon nang maaktuhan ang dalawang suspek na nakikipag-transaksyon sa isang poseur buyer at nakumpiska ang isang yunit ng cal. 5.56 rifle, isang yunit ng 30 rounder magazine, 33 piraso na bala, isang bandolier, at isang yunit ng cellphone na ginamit sa transaksyon.
Mahaharap ang mga suspek sa kasong paglabag sa Article V, Seksyon 32 o “Unlawful Sale of Firearms and Ammunition” ng Republic Act 10591 o “Comprehensive Firearms and Ammunition Regulation Act”.
Patuloy naman ang PNP CIDG na magsasagawa ng mandato na magbigay ng serbisyo publiko na hulihin ang mga nagkasala sa batas para sa maayos at mapayapang Bagong Pilipinas.
Panulat ni Patrolwoman Ma. Señora Agbuya
