General Santos City – Binisita ni Police General Dionardo Carlos, Hepe ng Pambansang Pulisya ang Police Regional Office 12 sa Tambler, General Santos City nito lamang Miyerkules, Marso 9, 2022.
Malugod namang tinanggap ng pamunuan ng Police Regional Office 12 sa ilalim ng pamumuno ni PBGen Alexander Tagum, Regional Director ang pagbisita ni Chief PNP, PGen Carlos.
Pinangunahan ni PGen Carlos ang pagbibigay parangal kina PMaj Zean Paul Cubil, PLt Joelito Espero, PSSg Alex Develos at PCpl Milbert Ybanez na tumanggap ng Medalya ng Kadakilaan sa pagpapakita ng kabayanihan at walang takot na hinarap ang humigit kumulang tatlong oras na bakbakan/engkwentro sa Macabual, Pikit, Cotabato na nagresulta sa pagkakahuli kay Mosim Manebped Dalandia Alias “Takuwad” o “Datu M. Dalanda” sa bisa ng Warrant of Arrest noong Pebrero 19, 2022.
Habang si PCol Jemuel Siason naman ay tumanggap ng Medalya ng Kagalingan sa isinagawang “OPLAN EREBUS” na nakapagdiskubre ng 4.6 milyong piso na halaga ng marijuana sa Sitio Magulo, Brgy. Miasong, Tupi, South Cotabato noong Enero 30 hanggang Pebrero 1, 2022.
Kasabay nito ay kinausap rin ni PGen Carlos ang mga tauhan sa PRO12 at mariin nitong pinaalala sa kapulisan na manatiling apolitical.
“Apolitical tayo, wala po tayong pulis na mag-bodyguard na hindi authorized ng Chief PNP”, ani PGen Carlos. Ito ay bilang paghahanda ng Pambansang Pulisya para sa mapayapa at malayang halalan 2022.
Mahigpit ring nagbabala si PGen Carlos na huwag masasangkot ang mga kapulisan sa anumang uri ng sugal lalong lalo na sa mga online gambling tulad ng E-Sabong.
Samantala, bilang pagpapalakas naman sa hanay ng pulisya sa PRO 12 ay nagbahagi si PGen Carlos ng LED screen sa kanilang hanay at ipinamahagi din niya ang limang helmet sa unit ng Highway Patrol Group na siyang tinanggap ni PCol Eliseo Malana Jr.
Labis naman ang pasasalamat ng mga kapulisan ng PRO 12 sa pagbisita at pagpapakita ng suporta ng Ama ng PNP sa Rehiyon 12.
###
Panulat ni Patrolman Khnerwin Jay A Medelin
