Matahimik, Puerto Princesa – Mabilis na rumesponde ang mga tauhan ng BFP at PNP sa nasusunog na Ice Plant sa Kalye Bajo, Zone 1, Barangay Matahimik, Puerto Princesa noong Lunes, Mayo 16, 2022.
Pinangunahan ni Fire Chief Inspector Nilo Caabay Jr, City Fire Director ng Puerto Princesa City katuwang ang Puerto Princesa City PNP ang pagresponde sa naturang ulat kasama ang iba’t ibang unit mula sa City Disaster Risk Reduction Management Council, lorry truck mula sa Puerto Princesa City Water District, Philippine Coastguard, City Anti-Crime Task Force at mga opisyales ng Brgy. Matahimik.
Ang naturang ice plant ay pagmamay-ari ni Michelle Timon.
Ayon sa ulat, 5:32 ng umaga noong Mayo 16 nang matanggap nila ang fire call mula sa 911 ngunit tinatayang 5:00 ng umaga nagsimula ang sunog.
Naideklara naman ang fire under control bandang alas 6:45 ng umaga.
Samantala, nagpapatuloy ang isinasagawang imbestigasyon ng BFP katuwang ang PNP upang matukoy ang dahilan ng sunog at halaga ng iniwang pinsala sa nasunog na ice plant.
###
Panulat ni Patrolman Erwin Calaus
