Naaresto ng pinagsanib na puwersa ng Police Regional Office 4A (PRO 4A), Philippine Army, at iba pang law enforcement units ang isang babaeng miyembro ng Communist Terrorist Group (CTG) na wanted sa kasong murder sa isinagawang implementasyon ng warrant of arrest sa Mahogany Village II, Brgy. San Isidro, Cabuyao City, Laguna, bandang 6:15 ng umaga noong Hulyo 30, 2026.
Kinilala ang suspek sa alyas na “Samay,” isang natitirang miyembro ng nabuwag na Platoon Glenn Marie Tamboong (GMT) at kabilang sa 1st Quarter 2026 Periodic Status Report ng Communist Terrorist Group–Southern Tagalog Regional Party Committee (STRPC). Siya ay inaresto sa bisa ng warrant of arrest para sa kasong murder na inilabas ng Regional Trial Court, Branch 46, San Jose, Occidental Mindoro noong Agosto 12, 2025, na walang inirekomendang piyansa.
Naging matagumpay ang operasyon matapos ang serye ng intelligence validation at case build-up na isinagawa ng Regional Intelligence Division 4A (RID 4A) Tracker Team, na nagkumpirmang nagtatago ang akusado sa Mahogany Village II mula pa noong Abril 30, 2026. Isinagawa ang operasyon sa koordinasyon ng Regional Mobile Force Battalion 4A, Cabuyao Component City Police Station, mga Provincial Intelligence Unit ng Laguna at Occidental Mindoro, San Jose Municipal Police Station, gayundin ng mga yunit ng Philippine Army.
Pinuri ni PBGen Dominic L. Baccay, Acting Regional Director ng PRO 4A, ang mga operatiba sa matagumpay na operasyon. Aniya, malinaw na ipinakikita ng pagkakaaresto na walang sinumang maaaring umiwas sa pananagutan sa batas, at patuloy na paiigtingin ng PRO 4A ang intelligence operations, inter-agency collaboration, at masinsinang pagpapatupad ng batas upang matiyak ang kaligtasan at seguridad ng mga komunidad.
Ipinakikita rin ng operasyong ito ang patuloy na suporta ng PRO 4A sa Focused Agenda ni PGen Jose Melencio C. Nartatez Jr., Chief, Philippine National Police, sa pagpapalakas ng intelligence at law enforcement operations, pagpapaigting ng ugnayan ng iba’t ibang ahensya, at pagpapatuloy ng kampanya laban sa kriminalidad at insurhensiya. Kasalukuyang nasa kustodiya na ng mga awtoridad ang naarestong suspek habang isinasagawa ang kaukulang dokumentasyon at paghahanda para sa paglilitis.
Muling pinagtitibay ng Philippine National Police ang matatag nitong paninindigan sa pagpapatupad ng batas at pagtugis sa mga taong may pananagutan sa krimen sa pamamagitan ng maagap na intelligence operations at koordinadong aksyon ng mga law enforcement agencies. Kaakibat ng matagumpay na operasyon ang patuloy na pagsusulong ng adhikaing “Bagong PNP para sa Bagong Pilipinas: Serbisyong Mabilis, Tapat, at Nararamdaman,” tungo sa mas ligtas, mapayapa, at maayos na pamayanan para sa lahat.
Source: PRO 4A
