Arestado ang apat sa limang suspek na sangkot sa panghoholdap ng cellphone sa mabilis na pagresponde ng pulisya at mga tanod sa KM 15, South National Highway, Sitio Soliman, Barangay Iwahig, Puerto Princesa City noong ika-17 ng Mayo 2024.
Kinilala ang mga suspek na sina alyas “Eric”, 24 taong gulang mula sa Barangay Tagburos; alyas “Gelo”, 18 taong gulang; aylas “Mik”, 20 taong gulang mula sa Bucan Matahimik, Barangay Iwahig; at alyas “John”, 24 taong gulang mula sa Tumbana Road, Barangay Tagburos. Ang isa pang suspek na si alyas “Rod” na residente ng Bucana, Barangay Iwahig, ay nakatakas at kasalukuyang tinutugis.
Ang insidente ay naganap bandang alas 8:00 ng gabi habang nakaupo at gumagamit ng kanyang cellphone ang biktimang si alyas “Nante”, 22 taong gulang at residente ng nasabing lugar.
Ayon sa salaysay ng biktima, siya ay nakaupo sa gilid ng highway nang biglang dumating ang mga suspek sakay ng isang topdown tricycle. Isa sa mga suspek, si alyas “Gelo”, ang lumapit at nanutok ng baril kay Caindoy sabay deklara ng holdap. Agad nilang kinuha ang cellphone ng biktima at mabilis na tumakas. Agad na nagsumbong si Caindoy sa mga tanod ng barangay.
Habang nasa outpost ng mga tanod si Nante, napansin niya ang mga suspek na dumadaan sakay ng topdown tricycle. Agad niya itong itinuro sa mga tanod na noon ay naka-duty. Dahil dito, agad hinabol ng mga tanod ang mga suspek at nahuli ang apat sa kanila. Narekober mula sa mga ito ang isang Cal.38 revolver na kargado ng apat na bala, isang basyo ng bala, at tatlong cellphone.
Hawak na ngayon ng Puerto Princesa City PNP ang mga nahuling suspek habang inihahanda na ang mga kaukulang kaso laban sa kanila. Patuloy rin ang pagtugis sa nakatakas na suspek na si alyas “Rod”. Ang mabilis na aksyon ng mga tanod at kapulisan ay nagbigay-daan sa agarang pagkakahuli ng mga suspek at pagbibigay hustisya sa biktima.
Source: Thunder News Philippines
Panulat ni Pat Desiree Padilla
