Arms cache ng CTG, natuklasan ng PNP sa Albuera, Leyte

0
38

Natuklasan ng Philippine National Police (PNP), katuwang ang Philippine Army, ang isang inabandunang taguan ng mga armas at pampasabog ng Communist Terrorist Group (CTG) sa Brgy. Tabgas, Albuera, Leyte noong Nobyembre 15, 2025. Narekober sa lugar ang isang .50 caliber Heavy Machine Gun (HMG) na may ekstrang barrel, isang bala ng Rocket-Propelled Grenade (RPG) na pinaniniwalaang bahagi ng isang Improvised Explosive Device (IED), at isang IED.

Naisakatuparan ang operasyon matapos makakalap ng mahalagang impormasyon ang Regional Mobile Force Battalion 8 (RMFB8) at Regional Intelligence Division 8 (RID8), na higit pang pinaunlad sa tulong ng 93rd Infantry Battalion ng Philippine Army. Sinuportahan din ito ng 805th Maneuver Company at Ormoc City Police Office (OCPO), na nagresulta sa matagumpay na pagkakatuklas sa apat na kagamitang pandigma.

Bilang pagtiyak sa kaligtasan ng publiko, nagsagawa ng kontroladong pagpapasabog ang mga tauhan ng PNP Explosive Ordnance Disposal (EOD) at Scene of the Crime Operatives (SOCO) sa mga nakuhang RPG ammunition at IED. Samantala, kinumpirma ng tatlong dating matataas na lider ng rebeldeng grupo na ang nasabing HMG ay pag-aari ng dating Provisional Regional Committee at huling ginamit noong 1988 para sa depensa ng kanilang kampo bago ito inilibing sa lugar.

Binigyang-diin ni PNP Chief PGEN Jose Melencio C. Nartatez Jr. ang kahalagahan ng intelligence-driven operations at patuloy na pagtutulungan ng PNP at Armed Forces of the Philippines (AFP) upang maagapan ang mga banta sa seguridad. Ayon sa kanya, bawat armas na nababawi ay nangangahulugan ng pagbawas sa mga kagamitang maaaring gamitin upang maghasik ng karahasan at maglagay sa panganib sa buhay ng mga mamamayan.

Ang operasyong ito ay bahagi ng PNP Focused Agenda, partikular sa Enhanced Managing Police Operations (EMPO), na naglalayong palakasin ang mga operasyong nakabatay sa intelligence upang maiwasan ang mga banta bago pa man ito makaapekto sa mga komunidad. Sa ilalim ng direktiba ni Pangulong Ferdinand R. Marcos Jr., patuloy na paiigtingin ng PNP ang mga hakbang upang mapigilan ang muling pagkuha at paggamit ng mga armas at pampasabog ng mga armadong grupo, alinsunod sa adhikaing “Bagong PNP para sa Bagong Pilipinas: Serbisyong Mabilis, Tapat, at Nararamdaman.”

Leave a Reply