Pangulong Marcos, nagpaabot ng pasasalamat sa mga ahensiya at mga Pilipinong naging bahagi ng matagumpay na ASEAN Summit

0
552

Nagpaabot ng pagbati at pasasalamat si Pangulong Ferdinand R. Marcos Jr. sa lahat ng ahensiya ng pamahalaan, organisasyon, at indibidwal na naging bahagi ng matagumpay na pagho-host ng Pilipinas sa 49th ASEAN Summit and Related Summits. Binigyang-diin ng Pangulo na ang tagumpay ng naturang pagtitipon ay bunga ng sama-samang pagsisikap, dedikasyon, at mahalagang kontribusyon ng maraming tao at ahensiya.

Kinilala ng Pangulo ang mahalagang papel ng Department of Foreign Affairs (DFA) at ASEAN National Organizing Council (ASEAN-NOC) sa pangunguna sa mga paghahanda at pagtiyak sa maayos na pagsasagawa ng mga pagpupulong at aktibidad. Pinuri rin niya ang Office of the President sa pangangasiwa at koordinasyon ng iba’t ibang ahensiya, gayundin ang Department of Tourism (DOT) at Office of the Social Secretary sa pagpapakita ng kagandahan ng Pilipinas at pagbibigay ng maayos at mainit na pagtanggap sa mga dayuhang panauhin.

Binigyang-pagkilala rin ni Pangulong Marcos ang mga uniformed services, partikular ang Armed Forces of the Philippines (AFP), Philippine National Police (PNP), at Philippine Coast Guard (PCG), sa pagtitiyak ng kaligtasan at seguridad ng mga delegado at panauhin. Kabilang din sa pinasalamatan ang Department of the Interior and Local Government (DILG), Department of Transportation (DOTr), Department of Public Works and Highways (DPWH), Metropolitan Manila Development Authority (MMDA), at mga lokal na pamahalaan sa pagpapanatili ng kapayapaan at kaayusan, pamamahala ng trapiko, at pagtiyak sa ligtas at maayos na paggalaw ng mga dumalo.

Kinilala rin ng Pangulo ang kontribusyon ng Department of Health (DOH) at mga medical at emergency response teams sa pangangalaga sa kalusugan ng mga dumalo, gayundin ang Presidential Communications Office (PCO), Radio Television Malacañang (RTVM), at iba pang media at communications teams sa maagap na pagpapalaganap ng mga balita at impormasyon hinggil sa ASEAN Summit. Pinuri rin niya ang mga performers at alagad ng sining na nagpakita ng talento at pagkamalikhain ng mga Pilipino sa harap ng mga kinatawan ng iba’t ibang bansa.

Nagpaabot din ng espesyal na pasasalamat si Pangulong Marcos sa sambayanang Pilipino, partikular sa mga naapektuhan ang pang-araw-araw na gawain dahil sa mga paghahanda at aktibidad kaugnay ng Summit. Binigyang-diin niya ang kahalagahan ng kanilang pagtitiis, pang-unawa, at pakikiisa, na muling nagpakita ng kilalang pagiging magiliw at mapagpatuloy ng mga Pilipino. Ayon sa Pangulo, naging matagumpay ang pagtitipon dahil sa mahusay na pagtupad ng bawat isa sa kanilang tungkulin, at ang pagsisikap ng lahat ay nagbunga.

Source: https://www.facebook.com/share/p/1DcWMwruNo/

Leave a Reply